ՌԱՀՀԿ հերթական սեմինարը նվիրված էր ընտրական փուլի առանձնահատկություններին

6 ապրիլի 2012թ., Երեւան: Ռազմավարական եւ ազգային հետազոտությունների հայկական կենտրոնի (ՌԱՀՀԿ) երիտասարդական դպրոցում այսօր տեղի ունեցավ հերթական սեմինար-դասընթացը, որը նվիրված էր «Հայաստանն ընտրական փուլում. ընտրական գործընթացներից հասարակական-քաղաքական ուժերի ակնկալիքները: Ընտրությունների մշտադիտարկման առանձնահատկությունները» թեմային: Այն վարեց եւ հայաստանյան ընտրական փորձի հղմամբ ամփոփեց ՌԱՀՀԿ փորձագետ Էդգար Վարդանյանը:

Ինչպես տեղեկացվել է ավելի վաղ, «ՀՀ-ում քաղաքացիական հասարակության կայացման եւ սահմանադրական պետության ձեւավորման հիմնախնդիրները. նոր մարտահրավերներ» ծրագրի շրջանակներում արդեն երկրորդ տարին ՌԱՀՀԿ-ում գործում է երիտասարդական դպրոց` սկսնակ քաղաքագետների եւ փորձագետների համար: Դասախոսություններին անվճար հիմունքներով կարող են մասնակցել վերոհիշյալ խնդիրներով հետաքրքրված երիտասարդներ:

Ռազմավարական եւ ազգային հետազոտությունների հայկական կենտրոնը 1994թ. հիմնադրել է ՀՀ առաջին արտգործնախարար Րաֆֆի Կ. Հովհաննիսյանը՝ արժանանալով հայաստանյան եւ Սփյուռքի աջակիցների լայն շրջանակների զորակցությանը: Հետեւելով համաշխարհային զարգացումներին, գիտելիքների հիմքեր խարսխելով, հանրության հետ երկխոսություն ծավալելով՝ Կենտրոնը հետխորհրդային տիրույթում հանդես է գալիս որպես երկրաքաղաքական ստեղծագործական մտածողություն ձեւավորող եւ միջազգային միջավայրի համապարփակ ընկալմանը նպաստող ուժ: Վերջին շրջանում Կենտրոնն առաջնահերթ տեղ է հատկացնում տարածաշրջանային անվտանգության ու համագործակցության, քաղաքացիական կրթության, պետության եւ ազգի համար վճռորոշ՝ ներքին ու արտաքին քաղաքականությունների կիրառական հետազոտությանը:

Լրացուցիչ տեղեկությունների համար կարող եք դիմել ՌԱՀՀԿ՝ Երեւան, Երզնկյան 75, հեռախոս՝ (37410) 528-780 կամ 274-818, հեռապատճեն՝ (37410) 52-48-46, էլ. փոստ root@acnis.am եւ info@acnis.am: