ՌԱՀՀԿ-ն հյուրընկալեց ֆրանսիական համալսարանի ուսանողներին

12 հունիսի 2012թ., Երեւան: Այսօր Ռազմավարական եւ ազգային հետազոտությունների հայկական կենտրոնի (ՌԱՀՀԿ) գիտական տնօրեն Մանվել Սարգսյանն ընդունեց Ֆրանսիայի «Փարիզ Վալ դե Մարն» համալսարանի Միջազգային փոխանակումների ու վարչարարության ֆակուլտետի մի խումբ ուսանողների, ովքեր Հայաստան եւ Լեռնային Ղարաբաղ էին այցելել ուսումնական ծրագրի շրջանակներում: Ուսանողների խնդրանքով Սարգսյանը ներկայացրեց ԼՂ հիմնախնդրի էությունը, ինչպես նաեւ պետական շինարարության գործընթացը Հայաստանի եւ Արցախի հանրապետություններում:

Ռազմավարական եւ ազգային հետազոտությունների հայկական կենտրոնը 1994թ. հիմնադրել է ՀՀ առաջին արտգործնախարար Րաֆֆի Կ. Հովհաննիսյանը՝ արժանանալով հայաստանյան եւ Սփյուռքի աջակիցների լայն շրջանակների զորակցությանը: Հետեւելով համաշխարհային զարգացումներին, գիտելիքների հիմքեր խարսխելով, հանրության հետ երկխոսություն ծավալելով՝ Կենտրոնը հետխորհրդային տիրույթում հանդես է գալիս որպես երկրաքաղաքական ստեղծագործական մտածողություն ձեւավորող եւ միջազգային միջավայրի համապարփակ ընկալմանը նպաստող ուժ: Վերջին շրջանում Կենտրոնն առաջնահերթ տեղ է հատկացնում տարածաշրջանային անվտանգության ու համագործակցության, քաղաքացիական կրթության, պետության եւ ազգի համար վճռորոշ՝ ներքին ու արտաքին քաղաքականությունների կիրառական հետազոտությանը:

Լրացուցիչ տեղեկությունների համար կարող եք դիմել ՌԱՀՀԿ՝ Երեւան, Երզնկյան 75, հեռախոս՝ (37410) 528-780 կամ 274-818, հեռապատճեն՝ (37410) 52-48-46, էլ. փոստ root@acnis.am եւ info@acnis.am: