ՌԱՀՀԿ երիտասարդական դպրոցում մեկնարկեց նոր թեմատիկ շարք

20 ապրիլի 2012թ., Երեւան: Այսօր Ռազմավարական եւ ազգային հետազոտությունների հայկական կենտրոնի (ՌԱՀՀԿ) երիտասարդական դպրոցում մեկնարկեց «Քաղաքացի-հասարակություն-պետություն» խորագրով թեմատիկ նոր շարքը: «Ափյուռքի ազդեցությունը Հայաստանի ներքաղաքական գործընթացների եւ պետական շինարարության վրա» թեմայով առաջին պարապմունքը վարեց ՌԱՀՀԿ ավագ փորձագետ Հովսեփ Խուրշուդյանը: Դասախոսությունն անցավ ունկնդիրների ակտիվության եւ շահագրգիռ մասնակցության պայմաններում:

Հիշեցնենք, որ արդեն երկրորդ տարին ՌԱՀՀԿ-ում գործող Երիտասարդական դպրոցը սկսնակ քաղաքագետներին ու փորձագետ-վերլուծաբաններին օգնում է խորը յուրացնելու քաղաքացիական հասարակության կայացման եւ սահմանադրական պետության ձեւավորման հիմնախնդիրները: Սեմինար-դասընթացները շարունակվելու են մինչեւ սույն թվականի հունիսի 15-ը` շաբաթական պարբերականությամբ:

Ռազմավարական եւ ազգային հետազոտությունների հայկական կենտրոնը 1994թ. հիմնադրել է ՀՀ առաջին արտգործնախարար Րաֆֆի Կ. Հովհաննիսյանը՝ արժանանալով հայաստանյան եւ Սփյուռքի աջակիցների լայն շրջանակների զորակցությանը: Հետեւելով համաշխարհային զարգացումներին, գիտելիքների հիմքեր խարսխելով, հանրության հետ երկխոսություն ծավալելով՝ Կենտրոնը հետխորհրդային տիրույթում հանդես է գալիս որպես երկրաքաղաքական ստեղծագործական մտածողություն ձեւավորող եւ միջազգային միջավայրի համապարփակ ընկալմանը նպաստող ուժ: Վերջին շրջանում Կենտրոնն առաջնահերթ տեղ է հատկացնում տարածաշրջանային անվտանգության ու համագործակցության, քաղաքացիական կրթության, պետության եւ ազգի համար վճռորոշ՝ ներքին ու արտաքին քաղաքականությունների կիրառական հետազոտությանը:

Լրացուցիչ տեղեկությունների համար կարող եք դիմել ՌԱՀՀԿ՝ Երեւան, Երզնկյան 75, հեռախոս՝ (37410) 528-780 կամ 274-818, հեռապատճեն՝ (37410) 52-48-46, էլ. փոստ root@acnis.am եւ info@acnis.am: