Մարկ Արեն, «Վիլ-Էվրար», «Բուկինիստ», 2018թ.
Կոմիտասը տեղափոխվել էր Ֆրանսիա, ապրում էր «Վիլ-Էվրար» հոգեբուժարանում: Հետո նա տեղափոխվեց «Վիլ-Ժուիֆ» հոգեբուժարան, որտեղ վախճանվեց: «Վիլ-Ժուիֆ»-ի մասին տեղեկատվություն շատ կա. նրան այնտեղ այցելում էին ընկերները, բարեկամները: «Վիլ-Էվրար»-ի մասին գրեթե տեղեկանյութ չկա: Հեղինակը չի կարող պնդել, որ այն, ինչ նա գրել է, տեղի է ունեցել, բայց չի էլ կարող հերքել:
«Վիլ-Էվրար»-ում երկու գլխավոր հերոս կա՝ երիտասարդ բժշկուհի Իզաբելը եւ նրա ղեկավարը՝ հոգեբուժարանի գլխավոր բժիշկն ու տնօրենը՝ տարիքն առած պրոֆեսոր Դյուպոնը: Հեղինակը որոշել էր գիրքը գրել այն բոլոր կանոններով, որով գրվում են նման պատմությունները: Կոմիտասի համար մի ընկեր հնարեց, որը նրա հետ նույն հիվանդասենյակում էր մնում՝ շախմատիստ Շպիլմախերը: Կոմիտասն անցել էր Ցեղասպանության միջով, իսկ Շպիլմախերին ապագայում Հոլոքոստ էր սպասվում: Հեղինակն ուզում էր կապել երկու ժողովուրդների ճակատագրերը. ասել է թե՝ եթե հայ ժողովուրդը չանցներ Ցեղասպանության միջով, նման բան չէր լինի նաեւ հրեա ժողովրդի հետ:
...Ես չէի կարող շրջանցել այն դժբախտությունը, որը տեղի ունեցավ մեր ժողովրդի հետ, եւ որի պատճառով Կոմիտասը մեկնեց Ֆրանսիա, բայց ես ուզում էի դրա մասին ասել այլ կերպ՝ առանց ցույց տալու որեւէ դաժան դեպք: Ինձ պետք էր, որպեսզի ես դրա մասին ասեմ 2-3 նախադասությամբ, բայց որպեսզի լայն հասարակությունը հասկանա այդ դժբախտության խորությունը: