Իվան Նեչույ-Լեւիցկի, «Կայդաշի ընտանիքը», վիպակ, թարգմանություն՝ Ռաիսա Ղարագյոզյանի, 244 էջ, «Անտարես», 2021թ.:
«Կայդաշի ընտանիքը» ստեղծագործությունը՝ գրված փայլուն տաղանդով, ուրույն գրելաոճով, մարդկային արատների հանդեպ ծակող սարկազմով ու գրավիչ հումորով, գրողի ամենանշանավոր գործն է եւ, բնականաբար, մեծ ժողովրդականություն է վայելում ուկրաինացիների մեջ, չնայած որ գրվել է գրեթե հարյուր հիսուն տարի առաջ:
Վիպակն ընթերցվում է, հետազոտվում գրականագետների կողմից, բեմականացվում, նույնիսկ հեռուստատեսային բազմասերիանոց ֆիլմ է դարձել «Բռնել Կայդաշին» վերնագրով, միայն թե ժամանակակից վարկածով:
Քչերին է հաջողվել ուկրաինացու հոգեբանությունն ու բնավորությունը բացահայտել այնպիսի վարպետությամբ ու ճշմարտացիորեն եւ այնպես գունեղ, ինչպես դա արել է Իվան Նեչույ-Լեւիցկին: Ուստի, հրատարակելով այս գործը, համարում ենք, որ այն ոչ միայն հաճույք կպատճառի հայ ընթերցողին, այլեւ հնարավորություն կտա ավելի սերտ ընկալել ուկրաինացուն, նրա հոգին, բնավորությունը, սովորություններն ու աշխարհայեցողությունը:
Հատկանշական է, որ գրքի առաջաբանը գրել է Հայաստանում Ուկրաինայի նախկին արտակարգ եւ լիազոր դեսպան, հայ ժողովրդի լավագույն բարեկամ Օլեքսանդր Բոժկոն: