Նարինե Աբգարյան, «Պատմություն խզբզիկներով», թարգմանությունը ռուսերենից՝ Նարինե Խաչատրյանի, «Արեւիկ», 2019թ.
Ռուսագիր հայ գրողի 4-րդ գիրքն է: Հերոսը Սեմյոն Անդրեեւիչն է՝ սեփական անձի հանդեպ մեծ հարգանք ունեցող փոքր տղան: Նրա մասին գիրքը նաեւ մեծերի համար է, քանզի նրանում արծարծված են երեք սերունդների փոխհարաբերությունները՝ տվյալ ժամանակին բնորոշ իրավիճակներում, որտեղ յուրաքանչյուր սերունդ ապրում է իր խնդիրներով, հետաքրքրություններով, հույզերով ու սպասումներով:
Գրքում հնգամյա մանչուկի կյանքից 8 պատմություն է ներկայացված, որոնցում կախարդական ու զարմանահրաշ բաներ չկան, ուղղակի պատմություններ են բարի, ազնիվ մարդկանց ընտանիքից: Ամեն պատմության վերջում Սեմյոն Անդրեեւիչն իր տպավորություններն է գրանցում նկարչական ալբոմում՝ կարճլիկ նախադասությամբ կամ արտահայտությամբ: Մեծերի կյանքում չափազանց լուրջ իրադարձությունները ժպիտ են առաջացնում, որովհետեւ թեթեւ են պատմվում՝ առանց բացասական ապրումների, երեխայի հայացքով:
Նարինե Աբգարյանի գրքերը Ռուսաստանում մեծ պահանջարկ ունեն, թարգմանվել են մի շարք լեզուներով: Գրական ատաղձը հիմնականում վերցված է Հայաստանից եւ իր ծննդավայր Բերդից:
«Պատմություն խզբզիկներով» ստեղծագործության գլխավոր հերոսի նախատիպը գրողի որդին է, որի հետ հերոսը շատ ընդհանրություններ ունի: Հեղինակի խոստովանությամբ՝ գիրքը գրելիս ինքը չէր մտածում, որ այն հենց փոքր ընթերցողին է հասցեագրված: «Ես ինձ մանկական գրող չէի համարի, որովհետեւ ես «սխալ» մանկական գրող եմ, այնպիսի բաների մասին եմ գրում, որ կլասիկ մանկական գրողները չէին գրի: Պարզապես ես ջանում եմ երեխայի հետ խոսել որպես հավասարը՝ հավասարի»,- մի առիթով ասել է Աբգարյանը: