Մորիս Լեբլան, «Արսեն Լյուպեն՝ ջենթլմեն ավազակ», արկածային վեպ, թարգմ.՝ Թերեզա Ստեփանյանի, 232 էջ, հրատ. «Էդիթ Պրինտ», 2025թ.:
Արսեն Լյուպենը հայտնի ֆրանսիացի գրող Մորիս Լեբլանի ստեղծած գեղարվեստական կերպարն է: Նա հաճախ բնութագրվում է որպես «ազնիվ կողոպտիչ» կամ «ջենթլմեն կողոպտիչ»։ Լյուպենը խորհրդավոր կերպար է, անորսալի ավազակ, որն ահաբեկում է Ֆրանսիայի հարուստներին։ Նրա ոճը ճանաչելի է, քանի որ միշտ թաքցնում է իր հետքերը, ջնջում ինքնությունը, եւ յուրաքանչյուր ոք, ով պնդում է, որ Արսեն Լյուպենն է, սխալվում է։ Ի վերջո, Լյուպենի յուրաքանչյուր հանցագործություն՝ լինի դա նկարների, աներեւակայելի թանկարժեք զարդերի, թե նույնիսկ հազվագյուտ գրքի գողություն, ուշադիր մշակված հնարք է, խաբեություն, կախարդական հնարք։
Նա հայտնվում է այնտեղ, որտեղ չպետք է լինի, ապա նույնքան անսպասելիորեն անհետանում է։ Այս գիրքը պարունակում է ինը նովել, որոնք գրվել են Մորիս Լեբլանի կողմից՝ 20-րդ դարասկզբին, եւ ներկայացնում են Արսեն Լյուպենի առաջին արկածները։ Առաջին պատմվածքը՝ «Արսեն Լյուպենի ձերբակալությունը», հրատարակվել է 1905թ. հուլիսին: Հաջողությունից անմիջապես հետո հրատարակիչը ոգեշնչել է Լեբլանին գրել շարունակությունը, եւ այդպես ծնվել են մի շարք պատմվածքներ պարոն գողի մասին:
Հեղինակը ստեղծում է թեթեւ, արագ ընթերցվող, բայց միեւնույն ժամանակ խորամանկ կառուցվածքով պատմություններ, որտեղ դետեկտիվ ժանրը միաձուլվում է արկածային գրականության ու նուրբ հումորի հետ։ Լյուպենը հաճախ ընկալվում է որպես հակահերոս, բայց նրա հմայքը եւ ինտելեկտը ընթերցողին ստիպում են համակրել նրան՝ նույնիսկ օրենքի խախտման պահին։ Սա գիրք է բոլոր նրանց համար, ովքեր գնահատում են դասական դետեկտիվի ոճը, խաղը եւ կերպարի վառ անհատականությունը։