Ջեյն Օսթին, «Համոզմունք», վեպ, անգլերենից թարգմանությունը՝ Արմենուհի Փալանդուզյանի, 336 էջ, «Անտարես» հրատ., 2024թ.:
Էն Էլիոթը` սնափառ ու դատարկամիտ բարոնետ սըր Ուոլտերի միջնեկ դուստրը, ութ տարի առաջ հրաժարվել է ամուսնանալ Ֆրեդերիկ Ուենթուորտի հետ՝ չնայած սերը փոխադարձ է եղել: Փեսացուի ծագումն ու նյութական հնարավորությունները ընտանիքի գլխավորին նրա օգտին չեն տրամադրել, աղջկա մորը փոխարինած հարևանուհին՝ լեդի Ռասելն էլ կարողացել է իր հորդորներով Էնին համոզել, որ նրա հետ ամուսնանալու խոստումը հետ վերցնի:
Ութ տարի անց նրանց ճանապարհները դարձյալ մեկտեղվում են: Աղջիկը քսանյոթ տարեկան է՝ սեփական ընտանիքում անտեսված, երիտասարդական առաջին թարմությունը կորցրած: Երիտասարդը ոչ միայն ռազմածովային նավատորմի նավապետ է, այլեւ արդեն հարուստ ու հաջողակ մարդ: Միայն թե տարիները նրանց երկուսի սրտում էլ վառ են պահել սերը, իսկ վարքագծում՝ հավատարմությունը:
Վեպի դիպաշարն էլ հենց այն մասին է, թե ինչպես են զարգանում այդ երկուսի հարաբերությունները, եւ ինչ ելք է ունենում նրանց երկարատեւ սիրո պատմությունը: