Նարինե Կռոյան, «Դանիելի գիրքը», վեպ, «Մագաղաթ» տպագրատուն, 2019թ.
«Դանիելի գիրքը» ստեղծագործություն է սիրո մասին, այստեղ սեւեր ու սպիտակներ չկան: Նուրբ հումորով համեմված վեպը պատմություն է փոփոխական աշխարհում փոփոխվող արժեքների մասին: Վթարի զոհ դառնալով՝ լրագրող Դանիելը հայտնվում է դժոխքի ու դրախտի «խաչմերուկում», առերեսվելով իր պահապան հրեշտակին՝ Սամուելին։ Պահապան հրեշտակը նրան ուղեկցելու է հրեշտակապետի մոտ, որտեղ էլ որոշվելու է Դանիելի ճակատագիրը:
Ստեղծված իրավիճակում հրեշտակի եւ մարդու հարաբերություններն անսպասելի զարգացումներ են ունենում։ Տեղի ունեցածի հետեւանքային իրավիճակը ներկայացված է հումորային երկխոսությունների, «երկնային» ճամփորդության, թռիչքի հնարավորության եւ անհնարինության տատանումների միջեւ:
Հեղինակի շեշտադրմամբ՝ մարդուն վերափոխող թիվ մեկ գործոնը սերն է, որը սկանդալային լրագրողին կարող է վերափոխել, դարձնել բոլորովին այլ մարդ: Այդ փոփոխությունը կարող է նաեւ հրեշտակի հետ կատարվել, եւ նա՝ շփվելով մարդու հետ, մարդեղանալ:
Սրանք ընդհանուր նկարագրություններ են, որ հարեւանցիորեն վերհանում են գրքում տեղի ունեցող սյուժետային ու ոճական առանձնահատկությունները: