Հարգելի այցելու, սա Ռազմավարական եւ ազգային հետազոտությունների հայկական կենտրոնի (ՌԱՀՀԿ) նորաբաց կայքէջի անդրանիկ թողարկումն է, որն այսօրվանից սկսած՝ շաբաթական թարմացումներով փոխարինելու է Կենտրոնի «Փոփոխվող աշխարհ. Հայացք Երեւանից» եռամսյա վերլուծական հանդեսին:
Արժանին մատուցելով տարիների իր վաստակամեծ առաքելությունն ավարտող պարբերականին, որտեղ զետեղվում էին Հայաստանի ու Մեծ մերձավոր արեւելքի տարածագոտու քաղաքական, սոցիալ-տնտեսական հրատապ հիմնախնդիրներին առնչվող ուշագրավ հետազոտություններ, օրախնդիր անդրադարձներ եւ այլ նյութեր, էլեկտրոնային նոր հարթակի խմբագրակազմն ու փորձագետ-վերլուծաբանների խումբը լ ի են այդ հարթակի բազմապիսի առավելությունները լավագույնս օգտագործելու վճռականությամբ:
Նախորդ փորձի լույսով անձնակազմը շարունակելու է հավատարիմ մնալ մամուլի ամենակարեւոր երկու սկզբունքներին՝ հեղինակային խոսքի լիակատար ազատությանը եւ անաչառության ապահովմանը: Զուգահեռաբար՝ գործածության մեջ կդրվեն այնպիսի հնարքներ, ինչպիսիք են թեմատիկ, ժանրային ու ոճական բազմազանությունը, նյութի կառուցիկությունը եւ մատուցման դյուրացումը:
Անցումը աշխատանքի նոր, առաջնակարգ ձեւերի՝ հնարավորություն կտա ավելի արագ ու հասանելի դարձնել տպագիր արտադրանքի շրջանառությունը՝ ներառելով կարծիքների լայն տարրապատկեր եւ անհամեմատ ավելի մեծ լսարան: Մի խոսքով՝ էլեկտրոնային տարբերակն ի զորու է ապահովել մեր հետազոտական գործունեության պատշաճ շարժընթացը, ռիթմը եւ վերլուծությունների թեմատիկ խճանկարը:
Այսպես՝ նոր «Հայացքը» ասպարեզ է իջնում ոչ միայն նոր ծրագրահենքով, գաղափարներով ու տեխնիկական նորովի լուծումներով, այլեւ ներհայաստանյան վայրիվերումները, փոփոխվող աշխարհի դեմքն ու գույները հնարավորինս անսխալ տարբերակելու, իմաստավորելու եւ հանրությանը ներկայացնելու գործում իր դերակատարության խորն ըմբռնումով:
Ուրեմն՝ հետեւեք մեր հետագա թողարկումներին՝ ՌԱՀՀԿ-ի «Հայացք Երեւանից» կայքէջի թարմ, իրատեսական, լուսառատ եւ կառուցողական շնչառությանը:
Մնում է՝ մեզ մաղթել բարի երթ, բեղմնավոր աշխատանք եւ հարատեւ ընթացք: Կհանդիպենք: