Քարեն Մակմանուս, «Մեզնից մեկը հաջորդն է», դետեկտիվ վեպ, բեսթսելլեր, 448 էջ, թարգմ.՝ Աստղիկ Աթաբեկյանի, «ՆյուՄեգ», 2024թ.:

Սա հայտնի եռագրության երկրորդ մասն է: Նախորդ տարի «ՆյուՄեգ»-ը ներկայացրել էր առաջին մասը, որը կոչվում է «Մեզնից մեկը ստում է»: Գրաքննադատներն ասում են, որ այս վեպը նոր շունչ է դետեկտիվ ժանրում: Գրավիչ եւ դինամիկ սյուժեն ստիպում է կառուցել վարկածներ ու լուծել գլուխկոտրուկներ:

Ամեն ինչ սկսվել էր եռագրության առաջին մասում, 5 աշակերտ պատժվել ու հայտնվել էին փակ սենյակում: Աշակերտներից մեկին՝ Սայմոնին սպանել էին, մյուսները ստում էին: Եվ այսպես՝ հեղինակն իր ընթերցողին կրկին վերադարձնում է Բեյվյու ավանի ավագ դպրոց, որտեղ նոր սարսափելի դեպքեր են տեղի ունենում: Սայմոնի մահից հետո քաղաքամերձ ավանը փորձում էր անցնել բնականոն կյանքի, սակայն մղձավանջն անսպասելիորեն վերադառնում է նորովի:

Անհայտ մեկը ավագ դպրոցի աշակերտներին ներքաշում է «Ճշմարտություն կամ մարտահրավեր» առցանց խաղի մեջ: Ժամերի ընթացքում հաջորդ զոհը պետք է ճակատագրական ընտրություն անի՝ հայտնե՞լ ճշմարտությունը, որի դեպքում դպրոցի բոլոր սովորողները կիմանան իր ամենամութ եւ ամոթալի գաղտնիքը, թե՞ անցնել փորձության միջով ու կատարել չափազանց վտանգավոր առաջադրանքը:

«Մեզնից մեկը հաջորդն է» թրիլլերում հերոսները պետք է պարզեն, թե իրենց մեջ ով է հաջորդ զոհը: Երիտասարդների մասին պատմող ու նրանց համար ստեղծված գիրքը համաշխարհային բեսթսելլեր է դարձել: