Քրիս Յուան, «Տան որսը», դետեկտիվ վեպ, անգլերենից թարգմանությունը՝ Էլմա Վարդանյանի, 292 էջ, «Նոր գրախանութ» հրատ., 2023թ.:
Լոնդոնի հայտնի թաղամասերից մեկում վաճառքի հանած տան համար, կարծես, գտնվել է համապատասխան գնորդ՝ հարուստ եւ հաճելի արտաքինով Դոնվանը։ Գլխավոր հերոսը՝ Լյուսին, որ փխրուն, ոչ կայուն հոգեբանական վիճակում գտնվող երիտասարդ կին է, հանգամանքների բերումով ստիպված է լինում անձամբ կազմակերպել տան ցուցադրությունը։ Արդյո՞ք դա նրան կհաջողվի, արդյո՞ք տղամարդը կլինի այն ցանկալի գնորդը, որին սպասում են։
Անկանխատեսելի շրջադարձեր, գաղտնիքներով պարուրված կերպարներ ու սարսափելի բացահայտումներ… Այսպիսին է բրիտանացի ժամանակակից գրող Քրիս Յուանի «Տան որսը», որը մի շնչով ընթերցվող թրիլլեր է։ Այն ողջ ընթացքում ընթերցողին պահում է լարվածության մեջ, բայց, միեւնույն ժամանակ, մոտիվացնում է, քանի որ վեր է հանում մարդկային ոգու անպարտելի ուժը եւ փաստում, որ անգամ թույլ մարդն ի վիճակի է աներեւակայելի հերոսության, եթե նրա առջեւ ազնիվ նպատակ է դրված։
Բրիտանացի գրող, բեսթսելերների հեղինակ Քրիս Յուանի «Տան որսը» կարդալիս պետք է հետեւել մի քանի խորհուրդների՝ ա/ արթուն չմնալ ողջ գիշեր, քանի որ գրքից կտրվելն անհնար է, բ/ կտրուկ շարժումներ չանել. սյուժեի անսպասելի շրջադարձերը կարող են գլխապտույտ առաջացնել, գ/ ընթացքում թուլացնել լարվածությունը, քանի որ յուրաքանչյուր նոր գլխի հետ այն ավելանում է, դ/ ի վերջո, պատրաստ լինել մի կողմ դնելու բոլոր գործերը, քանի դեռ չես հասել վերջաբանին։
Սակայն եթե անգամ չհետեւես այս խորհուրդներին, գիրքն արժանի է թե՛ իր վրա ծախսված ժամանակին, թե՛ այն հույզերին, որոնք ապրում ես ընթերցանության ողջ ընթացքում: