Հրանտ Դինք, «Այս սյունակի մարդը», պատմաքաղաքական հրապարակախոսություն, 426 էջ, «ՆյուՄեգ», 2022թ.:

Հրանտ Դինքի այս գրքում հարյուրից ավելի հրապարակումներ են, որոնք 1996 -2007 թվականներին տպագրվել են «Ակօս», «Յենի Բինյըլ» եւ «Բիրգյուն» թերթերում: Հեղինակը գլխավորապես անդրադարձել է աշխարհին, Արեւմուտքին, Սփյուռքին, հայ-թուրքական խնդրին, Թուրքիայի հայ համայնքին, ազգային փոքրամասնություններին, քրդական հարցին եւ, նույնիսկ, արծարծել է գլխաշոր կրելու համազգային վեճի թեման։

Ինչի մասին էր մտածում ու խոսում Դինքը։ Հոդվածներ, որոնք արդիական են նաեւ այսօր, հիմնախնդիրներ, որոնք չեն լուծվել մինչեւ հիմա։ NewMag-ը եւ «Հրանտ Դինք» հիմնարկը «Այս սյունակի մարդը» ժողովածուով ներկայացնում են Թուրքիայի ամենահայտնի հայի դիտարկումներն ու համոզմունքները, վերլուծություններն ու քաղաքական միտքը՝ մեկ գրքով։ Դինքի հեղինակած հոդվածների ընտրանին արտացոլում է այն պարզությունը, որով մարդը խոսում է ոչ թե մեծամասնության, ուժի եւ գերիշխանության, այլ փոքրամասնության, խոցելիության եւ ընդդիմության դիրքերից:

«Հրանտ Դինք» հիմնարկը ստեղծվել է 2007թ.-ի մեծ ողբերգությունից հետո՝ նման դեպքերը կանխարգելելու, Դինքի՝ ավելի արդար ու ազատ աշխարհակերտման երազանքներն իրականացնելու, նրա խոսքը եւ ոգին ապրեցնելու համար։