Ռոբերտ Կիյոսակի, Դոնալդ Թրամփ, «Ինչու ենք ուզում, որ դուք հարուստ լինեք», բիզնես գրականություն, անգլերենից թարգմ. Ա. Աղաբեկյանը, 376 էջ, «Անտարես» հրատ., 2025թ.:
«Ինչու ենք ուզում, որ դուք հարուստ լինեք» գիրքը համատեղ աշխատանք է երկու հայտնի գործարարների՝ Դոնալդ Թրամփի եւ «Հարուստ հայրիկ, աղքատ հայրիկ» գրքի հեղինակ Ռոբերտ Կիյոսակի։ Գիրքը հիմնված է նրանց տնտեսական աշխարհայացքի, բիզնես փորձի եւ անձնական պատմությունների վրա։
Հեղինակները խոսում են այն պատճառների մասին, թե ինչու ժամանակակից աշխարհում կարեւոր է զարգացնել ֆինանսական մտածողություն, սովորել ներդրումների հիմունքները եւ ձգտել ֆինանսական անկախության։ Գիրքը ներկայացնում է տարբեր տեսակետներ՝ իրական բիզնես փորձից մինչեւ կրթության ու ֆինանսական գրագիտության վերաբերյալ վերլուծություններ։ Թրամփը շեշտադրում է մեծ բիզնեսի ռազմավարությունները, ռիսկի գնահատումը եւ շուկաների շարժընթացը, Կիյոսակին կենտրոնանում է մտածողության փոփոխության, ակտիվների կառավարման եւ ֆինանսական ազատության մոդելների վրա։
Աշխատությունն արագ հարստանալու ուղեցույց չէ. այն ավելի շատ քննարկում է տնտեսական գործընթացները, ֆինանսական անհավասարության աճը եւ այն, թե ինչպես կարող է փոփոխվող տնտեսության պայմաններում անհատը պաշտպանել իրեն։ «Ինչու ենք ուզում, որ դուք հարուստ լինեք»-ը հարմար է այն ընթերցողների համար, ովքեր ուզում են հասկանալ ֆինանսական կայունության հիմնական սկզբունքները՝ անկախ իրենց ներկայիս եկամտից կամ փորձառությունից։
Գիրքը հրատարակվել է ավելի քան 20 լեզվով եւ արագ դարձել բեսթսելլեր բիզնես գրականության ոլորտում։ Կենտրոնական թեմաներից են ֆինանսական կրթությունը, նախաձեռնողական մտածողությունը եւ տնտեսական ինքնուրույնությունը։