«Փրկե՞նք հայրենիքը», Տիգրան Հայրապետյան, տարածաշրջանային վերլուծություններ, հատոր երրորդ, 392 էջ, Նյու Մեգ, 2023թ.:
Տիգրան Հայրապետյանի վերլուծությունների երրորդ հատորը բովանդակում է նրա առաջին երկու հատորներում հնչեցրած հարցերի պատասխանները։ Առաջին երկու հատորներում հեղինակը ճշգրտորեն, գրեթե մարգարեական կանխատեսմամբ ախտորոշում է Հայաստանի ու տարածաշրջանի առջեւ այսօր ծառացած խնդիրները։ Նա քննարկում է Արեւմուտքի ու Արեւելքի հավակնությունները եւ նրանց ծրագրերում Հայաստանի դերը։ Սույն հատորում հավաքված են հեղինակի այն հոդվածները, որոնցում նա պատասխաններ է փնտրում ու տալիս «Երկիրը ծանր վիճակից դուրս բերելու համար ի՞նչ պետք է անել» հարցին։
Տիգրան Հայրապետյանն այս հատորում ներկայացրել է Արցախի խնդրի կարգավորման 5 տարբերակ, վերլուծել բոլոր դետալները, իրար կողքի դրել փաստերը, համաշխարհային պատմության օրինակներն ու պատմական փորձը եւ դուրս բերել Հայաստանի համար լավագույն լուծումը։ Գրքում հեղինակը 44-օրյա պատերազմից ավելի քան 25 տարի առաջ կանխատեսել է, թե որ ուղղությամբ է թշնամին հարձակվելու Հայաստանի վրա եւ ինչ պետք է անել դիմակայելու համար։
Պետականության կառուցումն, ըստ Տիգրան Հայրապետյանի, համազգային խնդիր է: Հարցերի լուծումները քաղաքագետը շարադրել է տասնամյակներ առաջ, որոնք արդիական էին թե՛ վերջին պատերազմից առաջ եւ թե՛ այսօր՝ մեր այս անորոշ ներկայում. «Հայ ժողովուրդը մենակ է մնացել իր անսահման հավակնությունների ու աննշան հնարավորությունների հետ: Իրադրությունը պահանջում է առաջ քաշել նոր ազգային ու համամարդկային գաղափարներ, եւ որքան էլ այս երկուսի համադրումը ժխտում է մեր ավանդական մտածողությունը, դա միակ, իրականությամբ թելադրված հնարավորությունն է»,- այս եզրակացությանն է հանգել հեղինակը: