Էլենա Ֆերանտե, «Հեռացողների եւ մնացողների պատմությունը», վեպ, իտալերենից թարգմանությունը՝ Ջեննի Ֆիլյանի, 396 էջ, «ՆյուՄեգ», 2023թ.:
Էլենա Ֆերանտեի «Իմ հանճարեղ ընկերուհին» ընթերցողներին ներկայացրեց անմոռանալի Էլենային եւ Լիլային, որոնց հարատեւ ընկերությունը դառնում է հեղինակի նեապոլիտանական վեպերի առանցքը:
«Հեռացողների եւ մնացողների պատմությունը» այս շարքի երրորդ գիրքն է: Ամուսնական կյանք, որ ավարտվում է ամուսնալուծությամբ, հոբբի, որ վերածվում է համակարգչային տեխնոլոգիաների բիզնեսի: Ու բոլոր այդ իրավիճակներում, նրանք՝ Լիլան ու Էլենան, նորից հանդիպում են՝ խճճված իրադարձությունների ու ճակատագրի բերումով:
Նկարագրված է երկու ընկերուհիների կյանքը հասուն տարիքում: Նրանց արդեն միավորում են տարիների ընկերությունն ու անցյալը: Այս հատորը մասնագիտական աճի, փողոցային ակցիաների ու հեղափոխական իրադարձությունների մասին է: Էլենան ավարտում է էլիտար քոլեջ, ամուսնանում, երեխաներ ունենում: Հետո բաժանվում է հանուն առաջին սիրո, գիրք է գրում:
Լիլան աշխատում է երշիկի գործարանում. ձանձրալի, տանջալից աշխատանքին զուգահեռ ստիպված է հանդուրժել վատ վերաբերմունք, ծեծ ու նույնիսկ սեռական բռնություն: Այնուամենայնիվ, կարողանում է դուրս գալ այս վիճակից: Նա եւ Էնցոն, որի հետ ապրում է առանց ինտիմ ու զգացմունքային հարաբերությունների, հիմնում են համակարգչային ընկերություն: Շարունակությունը կարող եք ընթերցել գրքում: