Դեյլ Քարնեգի, «Ինչպես դադարել անհանգստանալ եւ սկսել ապրել», հոգեբանական բեսթսելլեր, անգլերենից թարգմ.՝ Աննա Աբրահամյանի, 344 էջ, «Կռունկ», 2022թ.:
Քարնեգին ամերիկացի գրող է եւ դասախոս: Մշակել է ինքնաբարելավման, առեւտուր անելու շնորհքի ձեւավորման, կորպորատիվ ուսուցման, հանրային ճարտասանության եւ միջանձնային հարաբերությունների հմտություններին վերաբերող դասընթացներ։ Հեղինակ է մի շարք գրքերի, այդ թվում՝ «Ինչպես ձեռք բերել բարեկամներ եւ ազդել մարդկանց վրա» (1936), «Անհայտ Լինկոլնը» (1932) եւ այլն։ Իր գրքերի ամենահայտնի մտքերից մեկն այն է, որ կարելի է փոխել մարդկանց վարքագիծը՝ փոխելով վարքագիծն իրենց հանդեպ:
Պետք է կարողանալ վայելել կյանքը՝ ինչպիսին էլ որ այն լինի։ Անհանգստությունը մեծագույն չարիք է, որն ավելի շատ է քայքայում մարդու առողջությունը, քան ցանկացած հիվանդություն։ Քարնեգին այս գիրքը գրել է հենց այդ նպատակով, որպեսզի ուրիշ մարդկանց հետ կատարված օրինակների հիման վրա մեզ պարզ եւ մատչելի կերպով սովորեցնի ամենակարեւորը. որ կյանքը պետք է շարունակել վառ գույներով:
«Թեթեւ ապրիր». այս արտահայտությունը հաճախ ենք լսում բոլորս: Բայց ինչպե՞ս… այս գրքում կգտնեք պարզ խորհուրդներ, թե ինչպես չանհանգստանալ ամեն մանրունքի համար, եւ վայելել կյանքը: Այն շատ կարճ է՝ բացասական հույզերի վրա ծախսելու համար: «Աշխատանքով ծանրաբեռնվածությունը երբեւէ ստեղծված լավագույն դեղամիջոցն է ոգու հուսահատության դեմ. Քարնեգի»: Նա առաջարկում է անհանգստությունից զերծ մնալու մի շարք եղանակներ եւ սովորեցնում ապրել հանգիստ ու լիարժեք կյանքով՝ անկախ առօրյայում հանդիպող դժվարություններից։